Rev 2 | BEF | STEP | Molo emito ya'ma luto lu nimi'ehina: Efeso hepato Hu'mamofihi bona'amagihi agelo ya suhi huto kaba hu noepalana bouba ma luto fayahi koyo emilenogo lu epilibe: Sonofi'i yahi lamaga'aga li'ehina to libi'i 7 golitu lolo hi'ahanamofihi komopa'agu bula ola bulata nohina bo ai'a lenali kumu ma luto nolibe:

Revelation of John 2

Efeso bonatoga ka'a molo'ehina

1 Molo emito ya'ma luto lu nimi'ehina: Efeso hepato Hu'mamofihi bona'amagihi agelo ya suhi huto kaba hu noepalana bouba ma luto fayahi koyo emilenogo lu epilibe: Sonofi'i yahi lamaga'aga li'ehina to libi'i 7 golitu lolo hi'ahanamofihi komopa'agu bula ola bulata nohina bo ai'a lenali kumu ma luto nolibe: 2 Nani lolo hite melete nehanamofihi hapa'a to foya'animofihi hapa'a kosele'i melenahago amuya melelata nehana yanamofihi hapa'a keheli'ohube. Lenali foipa bona'i laga mehana'a bu neenagagomu'i lenipa holata nohigo he'mi epele'ahana. To bona'i luga'a lenali hiti aposolo yabe lilete faga hiti lilago faga'animofihi hapa'a fi taga hi etete faga nelabe lite akeheli'ahabe. 3 To amuya melete minoba minoba hite nani kumu keke'i luse'namofihi lenugupisalo melelago kosele'i melenahago bati hite neminabe. 4 Ya hu'ehinaya nani ya'ma ana'ina ya suhi huna'mu kehelugo lenali kumu bati mehulata nohibe. Lenali yata'a komopatini nimilata hi'ahanamo ana suhi huto kana ma'asi mone meni'ibe. 5 Kohe toto ifo'aga meya mono kamu'i bati humofa'na hite mine'ahana yatai ya'ma alo'i behelefe limi'ahabe. Lenali ya hi'ahana'mu aku'i kehelilete foipanatini li he'milete komopatini i gelehe hite kohe tete bi'ahana kapomolo aku'i ya'ma i melete bilo. Ya suhi mehinogomo nani lenalitoga henetito libitini li soboto li he'miluna'mu yabe. Komopatini li gelehe mehinogo yamofihi li lepalaluna'mu yabe. 6 Luga'a ya'ma lenali kumu kehelugo bati hulata nohibe. Lenali Nikolasihi bona'a ya'ma lenali ana'ina lolo hite melete nehana ya'ma laga'ni menonebesibe luto lu'ohube. Yana'mu nani hiti lenali hiti moneko kumu menolebesibe.

7 Sikalafu'uba Hu'mamofihi yagapana'a li gehesa hi'ahana ka'a lu epito lu noepina ya'ma enegekesa hokolo hinogo keheliya ite kehelilabe. Luga'a enali mono ka amuya melete bite Satahi luba'a be ligilana'amagi ya'ma mefilise minoba minoba hilatanamofihi legeya'a Hu'mamofihi foya'agu biha'a ni'ina ya'ma nalabe luto keheli epilube luto nolube.

Semena bonatoga ka'a molo'ehina

8 To Semena hepatoga Hu'mamofihi yagapana'amagihi agelo ya suhi huto kaba hu epolo'ehina bouba kaga'a ma luto fayahi koyo eminogo lu epilibe: Kohe toto to alihi moloto ai filito aku'i ho tito minoba minoba hilata bo lenali kumu ma luto nohibe: 9 Lenali keke'i luse'namofihi lenele'me lite tite enumuhi meni'ina bona'i neminana ya'ma keheli'ohube. To lenali komopatinigu mono'mofihi fe'no hiti babu luto nehabe. To Yuta bona'i nohune lite lilata nehana enali lenali kumu libe pigi bibe hi lepelelata nehabe. Ya'a hiti keheli'ohube. To enali faga hiti lilete Yuta bona'i bati'a menehabe. Enali Satahi yagapana'a nehabe. 10 Lenalitoga keta'a huse'na aku'i huto hu lepilube'mu higo lenelesa melino. Keheli'ahafiye? Satau ai enimi'i mololata nasana huto hu lepilibe luto lenalitogati luga'a ya'ma naga nonugu lenele'mo malalina'mu yabe. Ya hulenogo keke'i luse'na keta huse'namofihi kana'a 10 yupapogu huto hu epilina'mu yabe. Lenali ya'ma mono ka li pili kete lite fililafi fa'mene minalafi lite minete kehelilenogo sekele mamu'a hiti kakili tegi huto ule'ale huto minolata nohinamofihi lito bi lepalalube'mu hube.

11 Sikalafu'uba Hu'mamofihi yagapana'a li gehesa hi'ahana ka'amofihi lu noepina ya'ma enegekesagu hokolo hilina'amagi ya'ma keheliya ite kehelilabe. Luga'amagi enali helebole hite bite Satahi luba'a be ligilana'amagi ya'ma alihi fililata nasanauba aku mone enele'mo sibina mehilibe luto nolube.

Pegamuma bonatoga ka'a molo'ehina

12 To Pegamuma hepatoga Hu'mamofihi yagapana'amagihi agelo ya suhi huto kaba hu noepalana bouba kaga ma luto fayahi koyoto emilenogo lu epilibe: Emita'i yatamalo mone megesaga to mone bulaga ni'igo li'ehina yauba lenali kumu ma luto nolibe: 13 Lenali hepa'i neminanamofihi hapa'a keheli'ohube. Yalo'i Satau kaba hu epalalina hepato nehabe. Lenali kaga'ni to nigi'ni li pili kete lite neminabe. To kaga'ni fala mekite nehago lu aku toto lu lepilata hu'ehina bo Atipasiu ai hepatini ya'ma Satau minoto lito nohina yalo ya'ma fili hoto lenali kana ya yupahi nani kumu keheli ule'ale ya'ma kete bi'ahanamo ni'ibe. 14 To nani lenali kumu nesi'a kehelugo sibina hulata nohina. Lenali hepatoga bona'i luga'a nehana lenali koyapa bo mone gi'a Balamu yabe ai'a ka'a enelepisemofihi kapogu bilata nehabe. Balamu ai Balakahi ya'ma Isilaeli bona'i lu epilube'mu faga lu emigo ai ya luto fi taga hu epoloto lugefa nasanamofihi seba'a nete minete mokonalo minete sibina hi'ahana. 15 Ana suhi hite, lenali hepatiniga bona'i luga'a enali Nikolasihi bona'a enali bona'magihi foipana lilete ana suhi mege'i nemalabe. 16 Yana'mu lenali foipatini li he'milete komopatini i gelehe hilo. Ya mehinogomo nani lenalitoga katiya'i henetito ana bo ya'ma luba li emito nabagaguti yatama emitatu luba huto enahaluna'mu yabe.

17 Sikalafu'uba Hu'mamofihi yagapana'a li gehesa hi'ahana ya'ma kaga ya luto lu noepina ya'ma enegekesa hokolo hinogo keheliya ite kehelilabe. Luga'amagi mono kagu ule'ale hite bite Satahi luba'a be ligilana'a ya'ma fala kito nose'na legeya'a mana yabe luto kokulumaguti limi'ehina nose'na epilube'mu hube. To kala efahi hapa'a ya'ma eto eto huto epilenogo yalo'i gi'a fayahi kosaba'i minenogo efapofihi afo'afu ai'asigo kehelilube'mu hibe luto nolibe.

Taitaila bonatoga ka'a molo'ehina

18 Taitaila hepatoga Hu'mamofihi bona'magihi agelo ya suhi huto kaba hu noepalana bouba kaga ma luto fayahi koyoto emilenogo lu epilibe: Hu'mamofihi pana'amofihi bu'auba logo guluya mehi ya suhi huto loto ai gigusa'a goli efahi logogu loloto lo gini gini nobina ya suhi huto ai'a lenali kumu ma luto nolibe: 19 Nani lolo hite melete nehanamofihi hapa'a to komopatini epilata nehanamofihi hapa'a to keheli ule'ale hite minalanamofihi hapa'a to enele'mo bati hilata nehanamofihi hapa'a bati huto ni'inaya yanamofihi hapa'a keheli'ohube. To kohe toto amuya melete nesi'a mine'ahanamo ni'ibe. Yatai ya'ma aku'i notibe. Ya'a hiti nokehelube. 20 To nani lenali kumu kehelugo luga'a sibina hu'ehibe. Lenali ya'ma Isilaeli bomofihi gihiti a'i foipa'a Yesepelo tegi huto mino'ehina a'i bu go he'milata hi'ahana ai'i nani mono ka loli'ali a'i nohube luloto yagapana'ni kaga lu epi epi hite enimi'i melete enohoka hago moko foya lite lugefa nasanamofihi seba'a nelata nehabe. 21 To komopa'a i gelehe hilibe luto kana'a molo eto'ohuna ya'ma ai'a komopa'a li gelehe mehuse moko lise'na mehe'milina'a huto keheli'ehibe. 22 Keheli'ahafihe? Nani yamofihi linogo'ni besise nasana ya'ma huto hu eminogo koloto minalibe. Ya nohuto ai'a hiti moko lilata nehana enalitoga keke boke sipi'a huto hu epilibe. Enali ana a'mo hiti moko li'ahanamo'mu komopa'ani i gelehe mehinogomo ya suhi huto hu lepilube'mu hube. 23 To ana a'mofihi yagapana'a enoho fili su halibe. Ya suhi hulenogo'ni noto noto bo mono ka keheli'ahanamagi nani bati'namofihi komopa'ani enegekesamofihi hapa'a bu go fe lu'ahata bo nohane lite keheliya ilabe. Nani bona'i asaga'i hite melete hilanamofihi afo'anifita pa soto nona'a eto eto huto epilube'mu nohube luto nolube.

24 To Taitaila hepatoga bona'i luga'amagi ana faga ka'a keheli he'milata nehabe. Ya hite, bona'i luga'amagi Satahi hapa hapa'a keheli fotogo huto keheli'ohune lite lilete nehana bona'magihi ka'ani lenali ya'ma kehelise mehabe. Lenali kumu lilugi kehelilo. Nani keta'a hiti nasana luga'a ya'ma lenugupisalo memalalube'mu hube. 25 To ana'ina li'ahanamo ya'ma li pili kete lilete minalo. Ya helite nebinogo henetiluna'mu yabe. 26 Luga'amagi enali mono ka'nigu amuya mele lite bite Satahi be ligite nani huto moloto hu'ohuna ya suhi hiba hiba hite lolo helite bite li su halana kana'a ya'ma nani'ni amuya epinogo'ni fato fato metoga bona'i enali'i bo enobo'anifihi lolo hite minalabe. 27 Afo'nifitogati amuya li'ohuna ana suhi huto lepinogo'ni aeoni fatusa lilete minete metoga bona silaga'i kaba hi epalalabe. Ya nehite osatu me somo itobo silata nohuta ya suhi hite lolo hi epalalune'mu habe. 28 To go'i nolina sonofi'i ofuyahi molo epalalube'mu hube.

29 Sikalafu'uba Hu'mamofihi yagapana'a li gehesa hi'ahana ya'ma kaga ya luto lu noepina ya'ma enegekesa hokolo hinogo keheliya ite kehelilabe.